Ah Trini Wine...

Dey say ah Trini could wine

It ingrain in dem

In dey veins and in dey waistline...

When dey waist twist so and dey dip down low

You'd think it's de oil in de coil that have dem so

Cause dey flex and stretch like elastic and

Den dey bumper does roll like suga dumpling

and when di tempo raise and di beat start to fasten di pace

Dey waist does get rude and outta line, rotating like a merry go round

and it goes round n round n round...

and dey does wine wine wine and 'tremble' it

if ah wasn't careful i'd think my eyes does play tricks

cause when dem start to wuk dey waistline so, man does cetch tail

and start to ram like bull and den dey turn dem around and start to 'pound'

and gyrate; ah swear dem sexing.

But di tourist like to see ah Trini wine and dingolay

Dey like to see dem cock up dey leg and back back

Dey like to ride on ecstasy train on Carnival Monday and Tuesday

Till di sun goes down and even den di sweetness still lingering...

So dey say ah Trini could wine

It rude rude rude but dey cyah get enough of we Trini wine -

di 'good' stuff right here... no wine, no rum.

It ingrain in dem, in dey veins and dey waistline...

And when di music start to play and di spirit take over

dey does get on 'wassy' and Wotless!

What I can't understand is why 'ah Trini' is only good for dey wine,

dey women and di lime - is as if everything else was shipped via FedEx!

Written by: Rachael N. Collymore
07.03.2011

© 2011